النجع أللي اليـــــا صار القحير....يغيــــروا فوق لحجل والاغر
شرابيـــــــــــن لمية البيــــــــر....الهــم خبـــــرات تباعة جرر
كفافيـــــــن لدموع الضريـــــر....وقت الحن ما كيـــــــفهم بشر
ماكر ديـــــــب في وقت النفير....صندي زيـــن ما يفوتاش زر
عفيف رهيف أرطب م الحرير....أيام الشوم اعصى من الحجر
اليـــوم أصبح معروف وشهير....ع الكرنيــــش نازل ع البحر
النجع اللي اليـــــــا جيــته يدير....أحشود أحشود وبضيـفه يسر
اليــــــوم تخش كان هناك ليــر....وكان ما فيـــــش من برا تمر
كسابيـــــــن معلوف الشعيــــر....سمايـــــــين مصباح او عمر
صبحوا اليـــــوم لوئي او منير....تحلف غيـــــر زريـــفت كفر
ما تقولش يـوم ركبوا ع البعير....ولا لبسوش مصــــلوخ الوبر
يـــــــبخ اليــوم في صنة عبير....وشعره تحت من كتفه ضـفر
كانك غيـــــــر ما تعرف تحير....ما تفرقش بيـــــن أنثى ودكر
منيــن الصقر ما يرضى يطير....تحت البوم ويـــشرب م الغثر
او ولد لجواد كيــــفه ما يصير....يولي بوم وصله طيـــــر حر
الزروق البريكي
18\1\1996\م
ماي شباب تشرب فالسكيــر.... وجو الصحرا حي عليه حر
لباسيـــــــن مصنوع الحرير.... ألي مضيـاق مايــــل للحمر
ركابيـــــــن سمحات الهديــر.... ضنا لجواد خشاشة وعـــر
كساحة راص والمقدر يصير.... بعون الله معبود البشـــــــر
الا الملبوس في شبحه تحير.... خيـوط الجرد لي لوطة تكر
عبد المجيد خليل
تريـــــس أجواد ياعبد المجيــــد .... الهم تاريــــــــــخ كتبنه سطور
أجيـــال أجيــال من ماضي بعيد.... تشهدلا سنيــــن ويام او شهور
خشاشيــــــــن كبوات الصهيــــد.... علىهمهام علوة تقـــول صور
اربد يـــــدكان كيـف لون الحديد.... حجل سباق لي لمح النضـــور
وفارس معروف بالراي السديــد.... رجال سقيــم ما يرضى الزور
صندي بنداق مدمن ع القليـــــــد.... موش ادمان هرويـن او خمور
ومو مهتم بي لبس الجديــــــــــد.... ومو مشغول بي حط العطــور
ومو شفاق لركــــــــوب الحديــد.... يديـــــر ويـــــن ما يــبي يدور
تحته كوت طايــــــــب للهيــــــد.... طيـــــاب غريــق حدفنه بحور
كيــــــف وكيـــف يا عبد المجيد.... يــــــساوة الحي بالي فالقبـــور
وعمر النار ماي كيـــــف الجليد.... وعمر الضل ما يـــــسوا النور
وديـــما الجيــــد ينجب غير جيد.... وارض البور تنبت غيـــر بور
وعمر الصقر ما يـــــــــابا يحيد.... مبادي هلا وعادات الصقـــور
وياريـــــــت الوقت يابالي يــعيد.... ماضي زيـــــن ذكره ما يـعور
حتى أف حلم ما يــــهمش يــجيد.... عقاب الليـــــل في وان الفجور
يــــــتهايا هيــــل في هوداً هويد.... هواه هليــــــل هبهــب فالبكور
وام الحيــــــــران حنت في نشيد.... بديــــــــــــع صداه قلنه أبرور
خضار خضار كيف لون الوريد.... بلا محرات مساطــــر اسطور
وقطعان أسعاي تقول تمرد مريد.... تزاحم كيــــــف تمشي بالدفور
وشيــــــوخ ونجع في عالم فريد.... يحيد الضيق وغشاش الصدور
أستاقض ناض ع العالم زهيــــد.... وكمشة لوح لايـــــد بيه صور
الزروق البريكي
4\10\1996\م
ليست هناك تعليقات:
إرسال تعليق