الأربعاء، 10 سبتمبر 2008

عظيم الذات


وين ياكلوا الجيفة عللي فـــات .... يجوا لي كلامك ياعظيم الــــــذات

بعد تشربوا لـــــــــــــــــــمرار .... وتجرعوا خردل مضاقه حـــــــار
وين ماطيح دياركم بالـــــــــدار .... ويهيمنوا ع النفط والــــــــثروات
ويرملوا الولايا ويدبحوا لـــبرار .... ويعتقلوا الشباب ويؤدو البنــــات
ويقسموا اللي زادن أقطار أقطار .... بيش يقعدن للغير معتــــــــــازات
وارض الرسالة تزدهر تعمـــار .... اب نفايات نووية وقـــــــــادورات
وبعد ينفلت من يدنا القــــــــرار .... قرار المعيشة زين يالممـــــــــات
هداك وين يستمعوا البــــو منيار .... النظريته ولسراطين والفضــــاءت

هلك ياجهينة يلعبوا بالنـــــــــار .... فلسطين لايمكن تكون تـــــــــــلات
هلك طالقين الحبل ع الجـــرار .... مصيرهم اتقرر فيه ناس اخــــرات
يباتوا نهار ويلعبوا اف لقمــــار .... وفي احضان توني وبوش مرتميات
خلوا الكريم اب يعبدوا الــدولار .... والقدس بيت ربي ماي منتجعــــات
وبدالي حرير وخمر وستتمــار ... ومسلسل مدبلج فالفضائيـــــــــــات

هاكم تنازلتوا ترا شن صـــــار .... عن كل ماسبق فترت الستيـــــــنات
وسرائيـل ملكت أسلحة الدمار .... الشامل ومنكم هــــــــان منزوعات
وكمين لاجي يدور اف دبــــار .... ملايين فالعالم يبو الحيــــــــــــــــاة
بين اهلهم فوق ارضهم وحرار .... أدنوبهم عليكم مان ع الـــــــغوزات
بعتوا القضية ببخس الاسعـــار .... وتساوموا على حاجات مشروعـات
نلتوا وسام السندسة والعـــــار .... مليتوا حقايـــــــــــب دل ويـــــهانات
طحتوا تملقتوا على الكفـــــــار .... تحسابوا الكم فالغرب عيلاقـــــــات
شنو نوعهن وانتم اقزام اصغار .... والفيل والفيرة مايجنش خــــــــوات
العالم تكتل في أوطان أكبـــــار .... بيش يسلموا ويحصلوا النجـــــــــاة
ويفاوضوا لحلاف والتجــــــار .... ويعيشوا اف كرامة وفي نما وثبات

حملنا أمرار الضيم والحصــار .... ماو ما قدرنا نلزموا السكــــــــــات
على ظلم نشحو فيه وستهتــــار .... ورهاب دولة وبهرجة قـــــــــوات
وستعمار يمشي ويعقبا أستعمار .... بسلوب ثاني وطرق ملتويــــــــات
وشريعة العالم فيد ناس أشــرار .... كيان يمتلك كل الصلاحيـــــــــات
وستعمال حق النقد بستـــــمرار .... وجماعات مطهدة وقليـــــــــــــات
والعالم اب كبره يحكمه سمسار .... في صالحة مافيش ممنوعــــــــات
يدير كيف مايبي جهار نهــــــــار .... ومن يقول لا بالسيف منطاعـــات
ودول تكتنز فالعام بالمليــــــــــار .... ودول كل عام يطلعوا الزكــــــــاة
وعداب وجحيم وغسورة ودمـــار .... أبادجي تقصف ودبابـــــــــــــــــات
يبوا القدس تبدا عاصمة السكــــار .... شارون فيها يحل خمـــــــــــــارات
لليهود تصبح فالنـــــــــــــهاية بار .... بلا مواخدة مرتع يهوديـــــــــــــات
نسوا من حنى ونسيوه ماضي صار .... ونسوا من بنى بابل ولهرامـــــــات
ومجاد كيف التبر والماجــــــــــار .... ان طال الزمان يزيدهن قيمــــــات
ولكن علينا اللوم ياحضــــــــــــار .... بلا ثمن نهدو فالتــــــــــــــــنازلات
والقو ياغوالي يزر ع العفــــــــار .... وحنى ضعفنا زاد العدو هيـبــــــات

وين ياكلوا الجيفة عللي فـــــــات .... يجوا لي كلامك ياعظيم الـــــــذات

زدنا امريكا هــــــــــــــــــــــــيبا .... خرصنا ومشينا كل حد في صــــــيبا
جيوشنا يجرن في ديول الـــــخيبا .... ملايين ليهن قرن مهــــــزومـــــات
وكم حشد يستطلع وكم كتــــــــيبا .... على الشعب يطربز اف ليداعــــات
ودروع ودخار فاتكة ورهـــــــيبا .... صرفوا عليهن شوق مليـــــــــارات
مخاسير ع اللبسه وع الــــــتدريبا .... فخامة وعرب تأمر وجــــــــنرالات
وفلاخير نستنجد اب قوم غـــريبا .... يجن من أمريكا جري فزاعـــــــات
ينصر الخو عالخو ويحاكــــــــيبا .... للعلام يبدا بطل فالشاشــــــــــــــات
ومطور سلاح يدور اف تجـــريبا .... على ناس في رتبت الحيوانـــــــات
ويزيدوا الديون ويحبكوا الحقـــيبة .... بعقود او ورق بجـــنس ودولارات
وتصبح أمريكا حدا ليهود قـــريبا .... تحميهم تقيل جنبهم وتبــــــــــــــات
وجيوشنا يباتن ع العروش رقــيبا .... بلكي الشعوب ادير حوحايـــــــــات
تطلع مساير عارمة وغضـــــــيبا .... عنكم أمريكا اتقص لـــــــــــمدادات
وتنزل عليكم يا الملوك مصـــــيبا .... ويحطوا بدايل غيركم مــــــــــرات

آن الاوان تعاودو ترتــــــــــــــيبا .... نظام الجيوش وحكم ليمـــــــــارات
مغيبين جانب مايجي تغــــــــــييبا .... شعب يمتلك كل المـــــــــــــقدرات
سلطة وسلاح وتروته في جـــــيبا .... يطهر ترابا من المحتــــــــــــــلات
وقادر على تشييط نار لهــــــــــيبا .... اف ديل كل من ناوي على الشينات
محنك وحاكنه ظروف عصــــــيبا .... وعندا اف تواريخ العرب صولات
خلى دموع الغازيلت سكـــــــــــيبا .... قعد لين روح دمعته فـــــــــــــلات
واليوم حقنا المسلوب ما بي جـــيبا .... لاملك لاقمة ولا السكـــــــــــــــات
ولا كامذيفذ لا بدير العـــــــــــــيبا .... ولا شرم شيخ ولا ستـــــــــنكارات
مفيت شعب مسلح شباب وشــــيبا .... وبي رادته ينصر المظلومـــــــــات
يوم لاأمير ولا وزير ينــــــــــــيبا .... ولا حكم رجعي يطمح اف غــايات
ولا سلطنة لافرد لاتحـــــــــــزيبا .... نساوين وتريس أحرار فالـــــرايات
على نهج طاعت ربنا وحـــــــبيبا .... محمد شفيع الناس فالغــــــــــسرات
شورى على القانون في تركــــيبا .... وشورى على تكوين ليــــــــــدارات
احرار في مداولته وفي تشطــــيبا .... حكام كلهم وعضاء اف مؤتمـــرات
وحرار في مسألته وفي تصـــويبا .... الغلط والعوج والخطى والســـــيات
ماو صيد تسابق علي تنيـــــــــيبا .... وحوش ميتة بالشر جيعانــــــــــات
وماهناك حرية تجي بالطـــــــيبة .... وفعل الجموع يدير لنجـــــــــــازات

يوم ياكلوا الجيفة عللي فـــــــات .... يجوا لي كلامك ياعظيم الـــــــــذات

بعد يفـــــــــقدوا لامـــــــــــــــان .... او وادي الشعوب يصيرله فيضــان
يسيل لين يرقى فوق من حيطان .... لحبوس وتعنقيرة الزنزانــــــــــــات
يهد القصور يكسر التيجــــــــان .... يفكن كنوز الرلسماليــــــــــــــــــات
اللي ع الحساب التاعب الجيعـان .... وجرى وعرق عامل ومأجـــورات
وفوق من كتوف الكادح التعبــان .... دار أرصدة برا وعيـــــــــــمارات
تنداس كيف مانداست ايام زمـــان .... نظم باليا ودول أحتكاريــــــــــات
سرقت عرق ويرادة الانســـــــان .... أقطاع وتهيمين وشيوعيــــــــــات
وتشارك الناس اف خير هالوطان .... وتساوى اف لستنفاع والمــــيزات
ولا فرق بين أفلان لا عـــــــــلان .... ولارباب عمل وبرزوازيــــــــات
والمسكن يولي ملك لسكــــــــــان .... والارض ملكها للجهد والمـــحرات
والشعوب تستمع للحان فالوجــدان .... والناس تنسجم بروع الـــمأثورات
هداك وين يصحوا ياكبير الشـــان .... وهاداك وين يرقوا الهالمســتويات

يوم ياكلوا الجيفة عللي فـــــــــات .... يجوا لي كلامك ياعظيم الــــذات


10\3\2003م

ليست هناك تعليقات: