الثلاثاء، 9 سبتمبر 2008

وثيقة عهد ومبايعة

عاهدناك قايـــــــــــدنا ولــــدنا .... نخون العهد ما يـــــــعلو بعدنا
علي الكيلاني

مــــــا تنقــــــــــــال فيـــــــــنا .... نخون العهد يـــا عالي جبيــــنا
نبدو جسر وانت أمشي عليـــنا .... ليـــــــن اطول غايـتنا وقصدنا
انت الربان وحنى لك سفيـــــنا .... ابواب الظلم ياقايــــــــــد رفدنا
قصور العدل ياقايد بنيــــــــــنا .... معاك وبيــــــــك يابونا وسندنا
فوق البشر ياقايد عليــــــــــــنا .... ابفكر فريــد ع الناس أنفردنا
تمرت قرن في عصرك جنيـنا .... فالفـــــــردوس في عهدك قعدنا
معاك معاك عدي سير بيــــــنا .... من غيــــر عهود مابالك وعدنا
وليك وليك مدينا يديـــــــــــــنا .... اف لوكر بــي وفالغارة صمدنا
وبيك وبيك للقمة عليــــــــــــنا .... وللتاريــــــــخ ماضيــــنا جبدنا
وفيك وفيك يامعمر القيـــــــــنا .... شخص عظيـــــم بفكاره نجدنا
بلاك بلاك ما ساعة غفيــــــــنا .... سنيـــــن العسف دنيــــتنا نبدنا
وراك وراك يا غالي عليــــــنا .... يــــوم الزحف ما يقولوا خمدنا
هلنا هلك ماضيك ماضيــــــــنا .... حنى ويـــــــــاك بالمر انكمدنا
ولي يعنيك يا بطل يعنيـــــــــنا .... ان مسك شـي قول حنى أتخدنا
على مبداك ولي بيك بيـــــــــنا .... يالهلاك يا التاريـــــــــــخ عدنا
لا هنًاك لا عنك سهيـــــــــــــنا .... لا نسيـــــــــناك لا عنك شردنا
لو القينا كيف قدامك فنيـــــــــنا .... يــــــوم الندل في زولك حسدنا
حنى وياك جمعتنا غبيــــــــــنا .... على صهيــــــون وفعاله شهدنا
حنى وياك لمتنا الزيـــــــــــــنا .... فالميـــدان صبيـــــــــــنا وحدنا
حنى وياك تبعنا نبيـــــــــــــــنا .... عشقنا الوطن والمـــولى عبـدنا
حنى وياك ناضلنا شقيـــــــــــنا .... تلات عقود ما لحضة همــــدنا
كيف اليوم ياضي المديـــــــــنة .... نخونوا عهد ع الدنـــــيا وجدنا
شعبك شعب ما يرضى الشيـــنا .... لا يــــــــندل لا يـــطلب الهدنا
فكرك فكر والفكرك صغيــــــنا .... وبيـــــــه اليـــــوم للقمة عمدنا
وطنك وطن هلنا ساكنيــــــــــنا .... يــــــــوم انضام جردنا حشدنا
وهدفك هدف وهدافك ثميـــــــنا .... أهداف زعيم ما كيــــفه عهدنا
ونصرك نصر ونصارك رزينا .... رصيد جديــــــد للشدة رصدنا
افريقيين لمتهم عليــــــــــــــــنا .... ضروف الوقت بالوحدة سعدنا
جمعنا طفل نظراته حزيــــــــنا .... بنار الغبن والضيم انصهـــدنا
بعنا الدل والعزة شريــــــــــــنا .... بعد يابطل ع البيـــــرك وردنا

عـــــــــــاهدناك ديــــــــــــــــما .... نصون العهد يا عالي القيـــمة
فوق الحمر عضعاض الصريمة .... لاهــــــبناه لا عــنه لبـــــــدنا
رغم القل والعيشة العديـــــــــمة .... وضيم الوقت والعدة او عددنا
وشوق عيال خلاها يتيــــــــــمة .... درنا صبر والواحــــــد حمدنا
وشوق اوطان خلاها هشيـــــمة .... علي ليــــــمان والله اعتـــمدنا
صنعنا مجد لمتنا العظيـــــــــمة .... قصــــــت فخــر للعالم سردنا
بنينا عز عمرنا الخيـــــــــــــمة .... نشيـــــــد النصر للعالم نشــدنا
زرعنا زرع فسنيناً قديـــــــــمة .... هاو اليـــــــوم بي دينا حصدنا
قعد العار في لخرين سيـــــــمة .... والصيت الزيــن لي والد ولدنا
وكانا رد لفعالا الدميــــــــــــمة .... قرار الموت يا قايـــــــــد اكدنا
تريس تقال ويدينا سقيــــــــــمة .... بايـــــــــعناك وفكارك أيــــــدنا
مانكبكبش لا نرضوا الشتيـــمة .... حيــــــــــاة الحر والعزة اعتدنا
يا أما الموت يا العيشة الكريمة .... عـــرفنا طبع فوق منـــه جمدنا
معانا الله نيتنا سليـــــــــــــــمة .... وكــــــــان الحــق في سباه بدنا
نبدو أبطال ما درنا جريـــــمة .... وفي التاريــــــــخ والجنة خلدنا


1\9\2000م

ليست هناك تعليقات: