المنية المــــنية وصلت حد الدنيا .... لوكان هلي في خيالي صــــــــــار
والغاية الــغاية وصلت حد مناية .... ساعة أنجيب الحلمتي فســــــــــار
رحلة قريبـــة اف ليبيا الحبـــيبة .... لاسويسرا طالب ولا بالغـــــــــــار
ماهي جنـــــية اليا نقلت النـــــية .... انودع الفية وعزوتي والجــــــــار
ساعة عشــــية أنوض م المنـشية .... ودار الزعيم وقلعة الــــــــــــثوار
سبها المبـــادي يوم نق الصــادي .... هلها الهم في الماضيات اجـــرار
تريسا اجـوادي ضربهم صرهادي .... قناقن اف ليل الذاهبين فنــــــار
سر البــــــادي فات منها غــــادي .... وصل لي تمسة ولي حدود آقــار
لا قوم جتهــــم حرفت لهجـــــتهم .... لا لبسوا الضيق لا حووا سمسار
لاقشرة عمـتهم خربت طينــــــتهم .... حشاهم من اللي السالفة ظفـــــار
لوغتهم كفتـــهم ليبيا كستـــــــــهم .... والصلب ديما صلب ما ينهـــــار
مهما اصــــــور فالحياة وطـــــور .... يظل دم جده في عروقة حـــــار
قول ما عليــــنا نرجعوا الطـارينا .... البيت القصيد وحلم هالنظـــــــار
يجهز عويـــنا يضمضما في حينا .... اف صالون غايتها تكون اصفار
تيوتا حديتــــة عندها تسفيـــــــتة .... تحلف عليها تقول جرس انــــدار
ورفقة رزيــنة يحيدو الغبيــــــنة .... امجربين كم مخطار في مخطــار
مصباح وقرينـا عمر ركن يميـنه .... ورهوما وفرج ومبارك وبكــــار
ودعنا الـشرارة جت غربي القارة .... مارشاتها عبن تقول أعصــــــــار
السبعطاش فتـنا غيرت برمتــنا .... بعد غدوة نزلت على ليســـــــــار
قصت خــلاوي بيستا وكــداوي .... قصت الكمبصات بالشمشــــــــار
جت فم لارانـب الليل تغـــــــالب .... عجلها مع القطران دار شــــــرار
واصل مســـيرة فات ع الحـميرة .... هلب مسقوين اف ظرف ما يذكار
درس وقفــــــا شور خوتا الشرفه .... خوت جد معروفين ليهم كـــــــار
بات وغـــــــفي الصبح كانه حـي .... ناوي على خشت أخلوج أكبـــــار
اتمسا نويـــــــنا بعد ما وفيـــــــنا .... البنزينا او وادعنا اصحاب الـــدار
وقفنا وقريــــــنا الفاتحة ومشـــينا .... قبور الصحابة يمينا بمتـــــــــــــار
اتمسا اوصلــنا طول ما طــــولنا .... قعد يفقهر فولى النهـــــــــــــــــار
خشت افيافــي ما عليكم خافــــي .... شوب الخاطر راح في تيـــــــــار
سرح بيه مـدا اف وقت بوه وجدا .... ومراح اليبل والكوت وام احوار
والعشبة الرهيفة والحياة العفيفة .... جرانين خلن فالكنين أثـــــــــــار
ساعة الحامــي كان صار الطامي .... فيسع يدير فوق من شوشــــــــار
مغزا كلامــي صور جن قدامـي .... خلى وين ماقعدن الا تذكـــــــــار
حتى قوت كانت في سريبا هانـت .... طواهن زمان العلم والتجــــــــار
الحاصل تقاصت فالبرور وغاصت .... واو الكبير اصبحت فالمنقـــــار
وهلبت قـــــرارة تبو لين تـوارة .... وراهم خدو قدامها مشــــــــــوار
وصلت مربـــــع ع اليمين يفـرع .... وطول وطريق أمبحرة مبحــــار
مشى طول ناوي فج موحش خـاوي .... تفاجا ابناية لونها يخضـــــار
ينقالها جبل زوما الطاف أنـــــسوما .... سبحان الكريم الخالق الصـــوار
وديان ومناظــر تسعد اللي ناضر .... تقيل وصفهن صاعب على الشعار
تنسيقا جمـــــيل وماحداه مثـــــــيل .... بنايات هندسهن أسطى معمــــار
أسرار الطبيـــعة اف وطنا وربيــعة .... ماكيفهن في وكر من لوكـــــــار
خلن الغـــــازي يعتدي والنــــازي .... يجرا ويطمع في تراب الــــــدار
وطني تـــرابا الهبل مايحســـــابا .... اب تقله ذهب مانقبلوه غيــــــــار
يانموت دونـــــه يانعيش أنصـــونه .... العند نكملوا مايعفسا أستعمــــــار
مايرهـــــــــبونا طز مايعـــــنونا .... يملو مجلد كل يوم قــــــــــــــرار
القسم فيد عــالي ماو فيد الغــالي .... لامريكية لا حلفها التيهــــــــــــار
يمشي رصاصة يدير ما في راصا .... حنى يانموتوا يانعيشوا أحـــــــرار
يكفي تنــازل هيدقا ومهـــــــازل .... شبعنا مناظر كذب وستهتــــــــار
القدس وحـــتلت والعراق أندلـت .... والخليج أستغلت عمل وستثمـــار
نوضوا وهـــبوا ندا الوحدة لـبوا .... مايفيد لا حتيجاج لا ستنكـــــــــار
الحل الوحـيد وماعداه اف لــــيد .... مادام قعد فولى القطـــــــــــــــــار
عفواً طلعـــنا ع الحديت قطعــنا .... لين ماو منا من لهيب النــــــــــار
غباين ملنــــا لين فاضن منـــــا .... فدينا حياة المرمدة والعـــــــــــــار
نقي هلـــــــــبنا بعد مـــــازودنا .... البنزينا وخشت في وطى تصفــار
الكفرة نويـنا وهي تقول سفيــنة .... على هود خالي ماعليه أســــــتار
لولا الرفاقة مونسا ومجـــلاقة .... والطرق الطويلة بينهم تقصــــــار
صالت وجالـت في خلاوي عامت .... وصلت الكفرة في عقاب نهـــــــار
تعشا وبات الصبح م البكرات .... عابي علىجرنان من لفجــــــــــار
ناض لاد لـــودا طاح في مقصوده .... اللي جايه قاطع عليه أوعـــــــــار
ذهب الحـــياة مردوم تحت وطى .... رويت اب دم لسلام والكفـــــــــار
مياهً غزيــــــرة في أعماق كبـيرة .... تسخير الكريم البادع السخـــــــــار
اماكينه يبخــن فالمياه يضخـــــن .... وجملة آبار أمسوطرات اسطـــار
مياهً اتجلـــب فالنفوس أطـــرب .... اب سوطاً يحيد ع القلوب غثـــــار
حس اب سعادة وين طال مـرادة .... والمركب ابدي جاهز اف لنتيظـار
حول عويــنا من حديد الزيــــنا .... ورفاقته عصالب ما يهابوا اخطـار
وعدا يتهـفا ع العيون تخــــــفا .... وفات يتموج موجة البـــــــــــندار
استغرب نصــيب وصارله تشــويب .... أسروح وشرود تقول خاش اكيار
لولا لمــــــية ماتوقض فــــــــية .... اداعك أتعافر فالحواف أعفـــــار
جاي جاي قــربو فات ع التـازربو .... حسه مثيل العزف ع الوتـــــــار
زاد اف ونيــنا وسرعتة وزنيـــنا .... سابق دعس جاضر يبي المضمار
وصلت الســـرير اف ظرف ماو كبير .... علي يسارنا لاحظ نصيب آبـار
زادن معــــدل سرعتا وتبـــــــــدل .... تعلى وفات تقول طار أطيــــار
جالو خطيــنا ووجلة خليـــــــــنا .... اف رمشة عيون الحر بو منقار
نزلنا البحـــــيرة واسعة وكبــــــــيرة .... في أجدابية مركز ضنا لميـــــار
الخاطر وهـق اف وسط تلت أطرق .... أختلن موازينه وفكره حـــــــار
لكن أصــرف دار كيف تعـــرف .... حصل نشد المجودين أكثـــــــــار
طبرق أمشرق وفالشمال يمـــرق .... الخزان الشهيد عمر بن مخـــــتار
والمركب تمــوج ع اليسار تعــــوج .... اف شور المغرب غيره المســـار
وفاتت تـزازي في طريق اتوازي .... اف شط البحر لبيض أبكل اصرار
كمين غـازي جاه طامع هـــازي .... روح يجرجر في ديول العــــــار
تكبد خســاير قعدات أمـــــــاير .... غباه شعب لخشوم العدو كســـار
واللي أمـكدب قبل راو تعدب .... فليدلفيا تنقللكم لخـــــــــــــــــبار
جميع من قربـــها نارها سيـــبها .... عربها أستحالة يقبلوا العـــــزار
قلبك كبــــير وعلى عداك خطير .... وقديش ع الكيد العدو صــــبار
وبالك طـويل وعلى عداك تقيـل .... تلقيت كم فاجر وكم غــــــــــدار
شاطي العـزة كل طامع لـــــزة .... ومايرهبك تهديد لا حصــــــــار
المولى معـانا وبركته ترعـــــانا .... وبدنه أيامك دايمة أنتصـــــــــار
الرحلة أزابـت ع العيون وغابـت .... تحت بر مساطر أجنن وزهـــار
البريقة خطـتها ركنها خلتــها .... وراس لانوف الدم فينا فــــــــار
وين ما تـوارو ع العــيون أدارو .... قعدو الرفاقة ليلهم سمـــــــــــــار
بن جواد جتـها وسرت ما وصلتها .... العند عقبت وديان ماتحصــــــار
وغاصت عشــية في القرضابية .... خزان في مرابي عقبن لفخــــار
جبروت العـادي دنسوه اجــدادي .... وقعدن أدماهم راويات أنهــــــــار
لكن ولــدهم هم هم جابلـــــــهم .... اف قوله وفعله والجيال أســــرار
وسر البـادي في عيونه بـــادي .... يلمع لميع يضبح نهار جهــــــــار
الحاصل تمرجح فالسرير أدرجح .... المصراتة وجلاوي الخمس قيس حكار
الساعة أطـناش الليل قـول أو واش .... دخل اطرابلس لاحن عليه أنــوار
وفضلت نــرجى لاكدر لا هرجـــى ....العند وين قال الفجر ياستـــــــــار
قالوا بشــــــــاير مرحبا بالزايـــــــر .... فالقربولي انتم تو ياخطــــــار
عدي تمــــايح شور سيدي السايح .... وسبها على ليســـــــار يا زوار
حنينها جدبــــها اتريد تمشي السبها .... الا شورها جت عكس مالتيــار
لولا الزيــــــنا ما تراجي فيـــــــنا .... وحاسبين كل حساب بالمـــقدار
أركبنا وطلعــــنا بعد ما ولعــــــنا .... أرقي حنينها اليا فوق دار قحار
وخشت الجـــونا ويمنت ترهــــــونا .... وغريان والعربان ما تنظـــــار
الا موهم عليهــن ع اليمين نبيهـــــن .... في وطن ماينجب الا لبـــــرار
بن وليد ركنــــت في فيافي سكــــنت .... وربيع الوطي أمفوحات عطار
وسلكت مســـالك سامحة وعــدالك .... جاهزات للقطران والمعمـــــار
وشقــــت ودي وأبار فيهــــن مى .... يحيدن مريض القلب مالكـــدار
وقصت اوطــان العامرات زمـان .... بنجوع البادي وكافت لخيـــــار
وتوا جفـــتوهن ناسهن خــلوهن .... كان لجدب والبوم والغبــــــــار
سواقها تغـير ع اليمـــــين ودير .... جيهة أبراك وقال ياغفــــــــار
حرام ماتحـــير لاذهب لاشـــــير .... عدادها وكمالياتها اب لــــزرار
دعست الكلـبة كيف فز الحــــربة .... قبل ما يحطه دارلا أختبــــــــار
ماطور اليخيدة يوم حطه ســـــيده .... حاسب حساب النقص بالمعيــار
ياباني محصحص لاعلي لا نقـص .... فن الوظيفة اف دمهم سيــــــــار
كمين سـاعة في خلى تــــداعة .... رقيت على القطران فـــــوقه دار
خرايط خـرايط حسها يتعـايط .... يلجن قمماها تقول آثـــــــــــــــار
فبراك قـربت وسط شيله شربت .... وخطمت على قويرة المال أطيار
ومنك طلعـنا وليك هاو رجعـنا .... يم لبلد ياسر يوم الثــــــــــــــــار
ودخل الشـرارة من طريق حجارة .... وجت بالرفاقة محدرا محــــــدار
لاقونا العويل الجيل تلو الجـــيل .... شباب وكبار وطفالهم لصغـــــار
وقالوا مراحــب جارهم والصاحب .... نشدني لمحت اف نشدته أستفسار
شبحنا وريـــنا شي فات عليـــنا .... يدل على أرادة شعب رى لمــرار
السنين علمـاته التجربة صنـعاته .... وجاه بطل ثوري ودارلا أعتـــبار
على ماتـعدد شي مايتــحدد .... ولا يحصره جاســــــوس لارادار
دارت أبــلادى شي ماهو عـادي .... تحلف اف مية عام مايـــــــــــندار
ماخلت مصـانع مدرسة لا جامع .... ولا غابن مساكن واسعات أكبـــار
وطرق وشوارع واسعة ومــزارع .... جاهزات م المحرات للجـــــرار
وبالنهر الصناعي والدليل الواعــي .... وبفكار العقيد الصقر بو منـــيار
علنا التحــدي يالعميل وعــدي .... خبر أمريكا وحلفها لشــــــــــــرار
وننهي كــلامي ونختما اب سلامي .... وصلاتي على اخر نبي مختـــار
محمد شفيـــع الناس يوم قطيــع .... ومرير وعسير بالدات ع الفجــار
26\8\1997م
ليست هناك تعليقات:
إرسال تعليق